बुधबार बिहान पोखराबाट जोमसोमका लागि उडेको तारा एयरलायन्सको दुर्घटनाग्रस्त विमानमा रहेका यात्रुहरुको शव संकलनमा हिमपात र वर्षाले बाधा पुर्याएको छ । समाचार अनुसार हिमपातका कारण दुर्घटनास्थलबाट नेपाली सेना र प्रहरी टोली फर्केको छ । मौसम खराब भएपछि शव संकलन गरेर हेलिकप्टरबाट पोखरा ल्याउने योजना असफल भएको हो । हिमपात, खराव मौषम र अग्लो ठाउँमा हेलिकोप्टर उडाउन कठिन भएपछि शव संकलन गरेर ल्याउन नसकिएको सुरक्षा अधिकारीहरूले जानकारी दिएका छन् । घटनास्थल १९ हजार फिट माथि रहेको र हिमपात भएका कारण समस्या भएको पोखरा विमानस्थलका प्रमुख दिपक बरालले बताउनुभएको छ । उहाँका अनुसार हिमाल आरोहीहरू ल्याएर मात्रै उद्धार गर्नुपर्ने देखिएकाले आवश्यक तयारीपछि बिहीबारसम्ममा शव संकलन गरेर पोखरा ल्याइने छ ।