सोलुखुम्बुमा एलडिओको कार्यकक्ष तोडफोड

बिक्रम श्रेष्ठ

पौष ५, सोलुखुम्बु

सोलुखुम्बुको स्थानिय बिकास अधिकारी महेश पराजुलीको कार्यकक्ष तोडफोड भएको छ । केही दिन अघि लुक्लामा सम्पन्न एभरेष्ट गोल्डकपमा मुख्य प्रायोजक जिबिस रहेर पनि कुनै सहयोग नगरेको भन्दै आयोजक फेण्डशिप युथ क्लब लुक्लाको युवाहरुले आइतबार एलडिओको कार्यकक्षमा तोडफोड गरेका हुन् । पर्यटन प्रबद्धर्नात्मक हाइअल्टीच्युट खेल मैदानमा आयोजना गरिएको बृहत राशीको खेल कार्यक्रमलाइ पहिले सहयोग गर्ने बचन दिएको तर कार्यक्रम सम्पन्न हुदा समेत कुनै सहयोग नगरेको भन्दै क्लबका आक्रोशित युवाहरुले स्थानिय बिकास अधिकारी महेश पराजुली बसिरहेको समयमै कार्यकक्षको टेबल तोडफोड गरेका हुन् । तोडफोडका कारण केही महत्वपुर्ण कागजातहरु पनि च्यातिएका छन् । आफुहरुको माग सम्बोधन नगरेको र उल्टै गैरजिम्मेवारपन देखाएको भन्दै तोडफोड गरेका हुन् । भोली बिहान सम्म आफुहरुको माग पुरा नभए जिल्ला बिकास समितिमा ताला लगाउने क्लबका अध्यक्ष नाम्गेल शेर्पाले जानकारी दिए । स्थानिय बिकास अधिकारी पराजुलीले आयोजकले मागे जति नै रकम सहयोग गर्न नसक्ने भन्दै जिल्ला स्थीत राजनितिक दलहरु संग छलफल गरि निकास निकाल्ने आश्वाशन दिएका छन् ।

गएको मंसिर महिनाको २२ गतेबाट २८ गते सम्म फ्रेण्डशिप युथ क्लब लुक्लाले बृहत पुरस्कार राशीको फुटबल प्रतियोगिता गरेको थियो । जिबिसले मुख्य प्रायोजक रही जिल्लाकै महत्व बोकेको उक्त कार्यक्रमलाइ सहयोग गर्ने अलिखित भद्र सहमति भएको दुबै पक्षले स्वीकार गरेका छन् । जिबिसको सहयोग पाउने भरोसाले खेलकुद मन्त्री समेत ल्याएर कार्यक्रम सम्पन्न गरेको क्लबले प्रतियोतिाका लागि झण्डै ४० लाख रुपैयाँ खर्च भएको जनाएको छ । त्यसको आधा रकम अर्थात २० लाख रुपैयाँ जिबिसले सहयोग गर्नु पर्ने आयोजकको माग छ । तर स्थानिय बिकास अधिकारी पराजुलीले प्रतियोगिताका लागि २ लाख रुपैयाँ मात्रै जिबिसले दिन सक्ने बताए पछि उनीहरुले तोडफोड गरेका हुन् । तोडफोड पछि रकम सहयोग गर्ने संबन्धमा छलफल गर्न जिबिसले सोमबारका लागि सर्बपक्षिय बैठक नै बोलाएको छ । सोमबार दिउसो सम्म पनि माग पुरा नभए जिबिसमा ताला लगाउने चेतावनी दिएका छन् ।