गाविसका छाप बुझाउँदै सचिवहरुले भने- माग पूरा नभए जिविसमा तालाबन्दी गर्छौं
 |
| सोलुखुम्बुका गाविस सचिवहरुले जिल्ला विकास समितिमा बुझाएको छाप |
५ असोज, सोलुखुम्बु । सरकारले प्रोत्साहन भत्ताको माग पूरा नगरेको भन्दै सोलुखुम्बुका गाविस सचिवहरुले जिल्ला विकास समितिलाई सामूहिक रुपमा छाप बुझाएका छन् । सोलुखुम्बुका ३० वटै गाविस सचिवहरुले निमित्त स्थानीय विकास अधिकारी बुद्धिनारायण श्रेष्ठलाई गाविसका छाप बुझाएका हुन् ।
काम ठप्प पारेका सचिवहरुले मासिक तलवको ५० प्रतिशत प्रोत्साहन भत्ता माग गर्दै आएका छन् । देशैभरिका सचिवहरुले कार्यसम्पादन मूल्यांकनका आधारमा प्रोत्साहन भत्ता पाएपनि आफूहरुले नपाएको सोलुखुम्बुका गाविस सचिवहरुको भनाइ छ ।
गाविस सचिवहरुको आन्दोलनका कारण हिमाली जिल्ला सोलुखुम्बुका सर्वसाधारणले सास्ती पाएका छन् ।
जिविसमा तालाबन्दी गर्ने चेतावनी
प्रोत्साहन भत्ता तीन दिनभित्र सचिवहरुको खातामा नआए जिल्ला विकास समितिमा तालाबन्दी गर्ने उनीहरुले चेतावनी दिएका छन् ।
गाविस हकहित संरक्षण केन्द्रका अध्यक्ष पशुपति पोख्रेलले राज्यले दिने भत्ताबारेमा पटक-पटक जिविसको ध्यानाकर्षण गराए पनि बेवास्ता गरिएकाले काम नै ठप्प पारेर आन्दोलनमा उत्रनु परेको बताए ।
सचिवहरुको छाप र विज्ञप्ती बुझ्दै निमित्त स्थानीय विकास अधिकारी बुद्धिनारायण श्रेष्ठले निरन्तर वर्षा भइरहेकाले बाढीपहिरोको जोखिम रहेकाबेला आन्दोलन नगर्न आग्रह गरेका थिए । तर गाविस हकहित संरक्षण केन्द्रका अध्यक्ष पशुपति पोख्रेलले आन्दोलन बाध्यताको उपज भएको बताए ।
स्थानीय विकास अधिकारी महेश पराजुलीले सचिवहरुको मागको बेवास्ता गर्दै कामको अवमूल्यन गरेको गाविस सचिवहरुको आरोप छ ।
तीनदिने अल्टिमेटम सहित ध्यानाकर्षण पत्र बुझाएको भोलिपल्टै (सोमबार) स्थानीय विकास अधिकारी पराजुलीले जिल्ला छाडेको गाविस सचिवहरु बताउँछन् ।
-शिखर गजरकोटेबाट
प्रतिलिपि अधिकार: - onlinekhabar
Comments
Post a Comment