छम्जी शेर्पा लाई सर्वोच्च शिखर सगरमाथा आरोहण गर्ने विश्वकै कान्छी आरोहीको उपाधी

सोलुखुम्बु गुदेलकी निमाछम्जी शेर्पा सर्वोच्च शिखर सगरमाथा आरोहण गर्ने विश्वकै कान्छी

आरोहीको रेकर्ड कायम गराउन सफल भएकी छिन् । उनलाई बुधबार गिनिज वर्ल्ड रेकर्डले दक्षिणी मोहडाबाट सगरमाथा आरोहण गर्ने विश्वकै कान्छी आरोहीको प्रमाणपत्र पठाएको हो ।

निमाछम्जीले २०६९ जेठ ६ गते शनिबार सगरमाथा आरोहण गरेकी थिइन्। आरोहण समयमा निमाछम्जी १६ वर्ष ६ महिनाकी थिइन्। प्रमाणपत्र पाएपछि निमाछम्जीले खुसी हुँदै भनिन्’, ‘बुधबारमात्रै साउथ साइडबाट सगरमाथा चढ्ने कान्छी आरोहीको उपाधि पाएँ, एकदमै खुसी लागेको छ ।’

रेकर्ड पाउन झन्डै तीन वर्ष पर्खनुपरेको उनले सुनाइन् । उनले सगरमाथा आरोहण गरेपछि उनका बुबा डेन्डी छोरीको रेकर्ड कायम गराउन लागिपरेका थिए। १८ जनाको समूहमा निमाछम्जीसँगै उनका बुवा डेन्डी पनि सगरमाथा चुचुरामा पुगेको थिए ।

बुवाछोरी एकैपटक सगरमाथा आरोहण गरेको पहिलो घटना भएको जनाउँदै गिनिज बुकले उनीहरूलाई पहिलो बुवाछोरी सगरमाथा आरोही भएको रेकर्ड पनि दिने भएको छ । हाल राजधानीको बौद्धमा बस्दै आएकी निमाछम्जीले जोरपाटीमा रहेको हिमालयन इन्टरनेसनल मोडल उमाविबाट प्लस टु सकिन् ।

आफ्नो उद्देश्य पहिलेदेखि नै पर्वतारोहण क्षेत्रमा रहेको उल्लेख गर्दै उनले यस रेकर्डले झनै उत्साह थपेको बताइन् । ‘मलाई पहिलेदेखि नै माउन्टेन प्रोजेक्ट मन पर्थ्यो, यस रेकर्डले झनै हौसला मिलेको छ ।’

उनले आफूले पाएको रेकर्ड साउन ३१ गते आइतबार पर्यटन बोर्डमा एक कार्यक्रम गरी सार्वजनिक गर्ने तयारी रहेको बताइन् ।