भगवान भरोसामा फाप्लु बिमानस्थल

बिक्रम श्रेष्ठ

सोलुखुम्बु १८, साउन : पहाडी क्षेत्रकै ब्यस्त मानिने सोलुखुम्बुको फाप्लु बिमानस्थललाई तारबार नगरिदा बिमानस्थलको सुरक्षामै खतरा बढेको छ । करिब १ वर्ष अघि कालोपत्रको काम सम्पन्न भएपछि पहिलेको तुलनामा निक्कै ब्यस्त रहने सदरमुकाम नजिकैको उक्त बिमानस्थलको कहीँ पनि तारबार लगाइएको छैन ।

लम्बाई ६ सय ५० मिटर तथा चौडाई २० मिटर धावनमार्ग भएको उक्त बिमानस्थल कालोपत्रे गरिएपनि तारबार नगरिदा बिमानस्थलको सुरक्षा नै फितलो बनेको छ । बिमानस्थलको धावनमार्गमा जहाज अबतरण गर्ने समयमा कुकुर पस्ने, मानिसहरु समेत ओहोरदोहोर गर्ने गरेको पाइएको छ । तारबार नभएकै कारण जहाज अबतरण गर्ने क्रममा बिमान सुरक्षाका लागि खटिएका प्रहरीहरुले मात्रै जहाज अबतरण हुने समयमा धावनमार्गको पुर्ण जिम्मेवारी लिन सकेका छैनन् ।

बिमानस्थलको ठिक माथि सडक रहेकाले बिमानस्थलको वरिपरि सर्बसाधरणको बढी चाप रहने गर्दछ । बिमानस्थलका सुरक्षाकर्मीहरुले बेवास्ता गर्दा सर्बसाधरणहरु समेत स्वतन्त्र रुपमा धावनमार्गमा हिडिरहेका हुन्छन् । बिहानीको समयमा मात्रै उडान भर्ने फाप्लु बिमानस्थलमा दैनिक ३० वटा सम्म जहाज अबतरण हुने गर्दछ । बिमानस्थल भित्र प्रबेश गर्ने क्रममा कडाई नगर्दा चारपाङग्रे सवारी साधनहरु समेत निर्बाध रुपमा गुडिरहेका छन् ।

मानिस भन्दा जनावरलाई नियन्त्रण गर्न कठिन भएको फाप्लु बिमानस्थलका एयर ट्राफिक कन्ट्रोलर आकाश मण्डलले बताए । “यहाँको बिमानस्थल भगवान भरोसामा चलेको छ, बिमान अबतरण गर्ने समयमा मलाई त साह्रै डर लाग्छ ।”

बिमानस्थल कालो पत्रे गर्ने ठेक्का लिएको कम्पनि एम के खानीले तारबार गर्ने काम आफुहरुको नभएको दाबी गर्छ । उक्त ठेक्केदार कम्पनीका स्थानीय प्रतिनिधि दावागेलु पाख्रीनले तारबार गर्ने कार्य आफुहरुको जिम्मेवारी भित्र नपर्ने भन्दै तारबार गर्ने कार्य नेपाल नागरिक उड्ययन प्राधिकरणले गर्नु पर्ने बताए । तारबारका लागि अहिले सम्म प्राधिकरणले पनि चासो देखाएको छैन ।

बिमान सुरक्षा गार्ड पनि पर्याप्त नहुँदा थप समस्या भइरहेको मण्डलले बताए । त्यस सँगै बिमानस्थलको सुरक्षा ब्यबस्थामा पनि कडाई नभएको कारण अनाबश्यक मानिसहरु पनि बिमान पार्किङ स्थलमै पुग्ने गरेका छन् भने अनाबश्यक भिड पनि बढिरहेको छ । उनीहरु धावन मार्गमा जथाभाबी जुनसुकै बेला पनि हिडिदिने गरेकाले थप चुनौती थपिएको हो । हाल सम्म कुनै अप्रिय घटना भने यस बिमानस्थलमा घटेको छैन ।

यसैबीच, तारा एयरलाइन्सको नयाँ ट्वीनअटर जहाजले फाप्लु बिमानस्थलबाट पहिलो पटक उडान भरेको छ । ९ एनएकेएल कल साइन भएको १७ सिटे क्यानिडियन जहाजले काठमाडौं देखि फाप्लु सम्म उडान भरेको हो । यात्रु सहित फाप्लुको धावन मार्ग टेकेको जहाज सोमबार बिहान सवा नौ बजे पुन काठमाडौं नै यात्रु लिएर फर्केको छ । तर सोलुखुम्बुका आकाशमा भने दोस्रो पटक उडेको हो । यस अघि आइतबार तेन्जिङ हिलारी बिमानस्थल लुक्लामा पहिलो पटक उडान भरेको थियो ।

प्रतिलिपि स्रोत:करोबर