पदयात्राका लागि सगरमाथा क्षेत्र सुरक्षित, क्षति १७ प्रतिशतमात्र

२२ साउन, काठमाडौं । पदयात्राका लागि बहुचर्चित खुम्बु (सगरमाथा) क्षेत्र सुरक्षित रहेको प्रतिवेदन सार्वजनिक भएको छ । अन्तर्राष्ट्रिय ख्यातीप्राप्त मियामोतो नामक संस्थाले खुम्बु पदमार्गको गहिरो अध्ययन गरि शुक्रबार यस्तो प्रतिवेदन सार्वजनिक गरेको हो ।

मियामोतो इन्टरनेशनलले खुम्बु क्षेत्रको प्राविधिक एवं भौगर्भिक अध्ययन गरेको थियो । मियामोतोको प्रतिवेदनमा खुम्बु पदमार्गमा रहेका होटल, बाटो तथा पुलहरु सुरक्षित रहेको उल्लेख गरिएको छ ।

संस्कृति पर्यटन तथा नागरिक उड्डयन मन्त्रालयले भूकम्पपछि पदयात्रा क्षेत्रको वास्तविक अवस्थाका बारेमा अध्ययन गर्न मियामोतो इन्टरनेशनललाई जिम्मा दिएको थियो ।

मियामोतोले खुम्बु क्षेत्रका १५ गाविसमा ७ सय १० वटा भवनको अध्यन गरेको थियो । जसमध्ये ८३ प्रतिशत भवन सुरक्षित रहेको अध्ययन प्रतिवेदन सार्वजनिक गर्दै मियामोतो इन्टरनेशनलका किट मियामोतोले बताए ।

भूकम्पले १७ प्रतिशत अर्थात एक सय २० भवनमा मात्र क्षति पुगेको उनको भनाई छ । पदमार्गमा रहेका मूल्य ९ पुलमा भूकम्पले खासै ठूलो क्षति नपुर्‍याएको प्रतिवेदनमा उल्लेख छ ।

क्षति पुगेका संरचनाहरुको पनि स्थानियहरुले पुनर्निर्माण गर्ने काम भइरहेको मियामोतोले बताए । पुनर्निर्माणका लागि आवश्यक सामाग्रीको अभाव रहेको बताउँदै उनले त्यसका लागि सरकारी सहयोग आवश्यक रहेको जानकारी गराए ।

प्रतिवेदनमा खुम्बु क्षेत्रका अधिकांश गाउँहरुमा भूकम्पको प्रभाव नै नपरेको उल्लेख छ । पदमार्गको केही ठाउँमा भत्किएको र ढुंगा खस्ने डर रहेपनि त्यसले खासै ठूलो क्षति नपुर्‍याएको बताइएको छ । तर, मनसुन पछि उक्त क्षेत्र फेरी भत्किन सक्ने बताउँदै मियामोतोले मनसुनपछि पुनः अध्ययन गर्नुपर्ने मियामोतोको सुझाव दिएका छन् ।

पर्यटनमन्त्री कृपाशुर लामाले मियामोतोलाई स्वतन्त्र रुपमा पदमार्गको सुरक्षा अवस्था अध्ययन गर्न जिम्मा दिएको बताए । मियामोतो प्रतिवेदनले दिएको सुझाव कार्यान्वयनमा आफुहरु जिम्मेवार रहेको बताउँदै उनले भत्किएको रुट मर्मत गर्न सरकार प्रतिवद्ध रहेको जिकिर गरे । मन्त्री शेर्पाले मियामोतोको प्रतिवेदनप्रति शंका नगर्न समेत आग्रह गरेका छन् ।

पर्यटन सचिव भूकम्पले बढी क्षति पुगेको भनिएका ठाउँका व्यवसायीहरुले त्यस क्षेत्रमा भूकम्पले खासै प्रभाव नपारेको र आफुहरु पर्यटकलाई सेवा दिन तयार रहेको बताइरहेको जानकारी गराए । काठमाडौंमा बसेर पर्यटकीय गन्तव्यका बारेमा आंकलन गरेर भ्रम फिँजाउन नहुने उनको भनाई थियो ।

पर्यटन विभागका महानिर्देशक तुलसीप्रसाद गौतमले भत्किएका सबै ट्रेकिङ रुटहरु मर्मतका लागि बजेटको व्यवस्था गरिएको बताए । ‘रुटहरु मर्मतका लागि छिट्टै बजेट आउँदैछ’ उनले भने- ‘सेप्टेम्बर महिनासम्म सबै रुटहरु मर्मत भइसक्ने छ ।’

महानिर्देशक गौतमले खुम्बु क्षेत्रमा भ्रमणमा जान चाहानेहरुलाई आफुहरुले स्वीकृति दिने जानकारी गराए । अहिले पनि मनास्लु र लाङटाङ क्षेत्रमा ट्रेकिङमा जान चाहानेहरु भेटिएको बताउँदै उनले पर्यटकहरु तालिमप्राप्त गाइडसँग समुहमा ट्रेकिङ जान सक्ने बताए ।