सोलुखुम्बुमा सुरवीर र बलबहादुर भिड्दै

कार्तिक १६, २०७४-सुरवीर राई र बलबहादुर केसी, नाम सुन्दै बलियो र सुरो लाग्न सक्छ । आगामी निर्वाचनको संघीय प्रतिनिधिसभाका लागि यी दुइजना सोलुखुम्बुबाट भिड्दैछन् । सुरवीर राईको खास नाम हेमकुमार राई हो । वाम गठबन्धनको तर्फबाट उम्मेद्वार बनेका उनी माओवादी नेता हुन् । बलबहादुर केसी काँग्रेसका केन्द्रिय सदस्य तथा पूर्वमन्त्री पनि हुन् । 

यी दुईको चुनावी भिडन्त पनि नामजस्तै रोचक हुने अनुमान गरिएको छ । प्राय: केन्द्रिय नेताहरु गृह जिल्ला बाहिर गएर पनि चुनाव लड्ने चलन छ । तर बलबहादुर केसी २५ वर्षदेखि सोलुखुम्बुबाटै उम्मेद्वार बन्ने गरेका छन् । ०६४ मा माओवादीका गोपाल किरातीसँग पराजित भएपनि ०७० को संविधानसभामा सभासद निर्वाचित भएपछि बलबहादुर पुरानै लयमा फर्किएका थिए ।

स्थानीय तह निर्वाचनलाई आधार मान्ने हो भने वाम गठबन्धन काँग्रेसभन्दा बलियो देखिएका छन् । जिल्लामा रहेका आठ स्थानीय तहमध्ये दुधकुण्ड नगरपालिकामा मात्र प्रमुुख पदमा कांग्रेस विजयी भएका थिए । अन्य तीन स्थानीय तहमा माओवादी र चार स्थानीय तह एमालेको पोल्टामा परेको थियो । एमाले र माओवादी दुवैको मत बाँडिएन भने वामले जित्ने प्रबल सम्भावना रहन्छ ।

विगतलाई हेर्ने हो भने चाँही काँग्रेस कमजोर देखिँदैन । ०४८ देखि ०७० सम्म पाँच पटक चुनाव लडेर चार पटक बलबहादुरले चुनाव जितिसकेको इतिहास छ । उनी अहिले छैटौँ पटक चुनाव लड्दै छन् । स्थानीय तह निर्वाचनमा कांग्रेसको आन्तरिक कलह र टिकट वितरण नमिल्दा हार व्यहोर्नु परेको कांग्रेसको भनाई छ । 

‘तुलना गरेर हेर्ने हो उम्मेद्वारको हिसाबले सोलुखुम्बुमा सुरवीर भन्दा बलबहादुर बलिया देखिन्छन्’, जिल्लाका काँग्रेस निकट एक पत्रकारले भने, ‘किनभने कांग्रेसको जिल्ला कार्यसमिति भित्र देखिएको विवाद केसीले मिलाईसकेका छन् । असन्तुष्ट नेताहरुलाई प्रदेशसभामा टिकट दिएपछि सबैले चित्त बुझाएका छन् ।’ यसअघि जहिल्यै केसीसँग असन्तुष्ट भएका काँग्रेसका जिल्ला सभापति आङगेलु शेर्पालाई नै प्रदेशसभाको टिकट दिएपछि अन्तर्घात कम हुने अनुमान गरिएको छ । 

वाम गठबन्धनका सुरवीर राई माओवादीका पूर्व लडाकु हुन् । यी दुईको झनै अर्को संयोग मिलेको छ । बलबहादुर र सुरवीर एउटै गाउँपालिका नेचासल्यानका हुन् । नेचाका सुरवीर हुन् भने सल्यानका बलबहादुर । बलबहादुरसँग जिल्लाका धेरै जनता स्थानीय तह पुर्नसंरचनाको बेलादेखि असन्तुष्ट छन् । कतिपय गाउँपालिका नामाकरणमा बलबहादुरले हस्तक्षेप गरेको आरोप छ । 

आफ्नै गाउँपालिकामा पर्ने साविकका तिङलाबासी समेत बलबहादुरकै विरुद्धमा छन् । अझ काँग्रेसको बलियो पकड रहेको भनिएको तिङलाले फेरी ‘नो भोट’ अभियानलाई निरन्तरता दिँदा केसीकै मत काटिने वाम निकट नेताहरुको भनाई छ । सोलखुम्बुमा जम्मा ६९ हजार ४ सय ११ मतदाता रहेका छन् । प्रदेशसभाका लागि भने वाम गठबन्धनको तर्फबाट दुवै क्षेत्रमा एमालेका उम्मेद्वार छन् । निर्वाचन क्षेत्र ‘क’ मा उत्तमकुमार बस्नेत र ‘ख’ मा बुद्धिकुमार राजभण्डारी छन् । त्यसैगरि काँग्रेसको तर्फबाट निर्वाचन क्षेत्र ‘क’ मा प्रकाशसिंह कार्की र ‘ख’ मा आङगेलु शेर्पा छन् ।