यसकारण पक्राउ परे आङकाजी शेर्पा

चार दिन हिरासतमै राख्न अदालतको अनुमति

काठमाडौं : कुनै बेला आदिवासी जनजाति महासंघका महासचिव रहेका ६० वर्षीय आङकाजी शेर्पा पछिल्लो समय फेसबुकमा आक्रमक स्टाटस लेखेर चर्चामा थिए ।

संघीय समाजवादी फोरममा समेत सक्रिय उनले क्षेत्री बाहुन समुदाय, कांग्रेस र एमालेमाथि धेरै प्रहार गर्दै गाली गलौजसहितका स्टाटस लेख्दै आएका थिए । उनले हिन्दु धर्म तथा त्यसका अनुयायीलाई पनि गाली गर्दै आएपछि उनको कडा आलोचना भइरहेको थियो ।

राजनीतिक दल र अन्य जातजातिमाथि गालीगलौजका स्टाटस लेखिरहँदासम्म मौन बसेको प्रहरी यो पटक भने आङकाजीलाई पक्रन बाध्य भयो ।

केही समयदेखि प्रहरीको निगरानीमा पर्दै आएका उनले पछिल्लो पटक थरुहटबाट भदौ ७ गते टीकापुरमा एसएसपीसहित ८ प्रहरी र एक बालक मारिएको घटनामा सुरक्षानियकायलाई नै विवादमा तान्ने गरी स्टाटस लेखेपछि प्रहरी चुप लागेर बस्न सकेन ।

टीकापुर घटनापछि फेसबुकमा उनले लेखेको ‘टीकापुर घटनाका १३ रहस्य’ शीर्षकको स्टाटसमा उनले प्रहरीबाटै थारुका घर जलाइएको र थारु समुदायका छोरीलाई बलात्कार गरेको गम्भीर आरोप लगाएका थिए ।

उनले एसएसपी लक्ष्मण न्यौपानेले थारु आन्दोलनकारीमाथि गोली हान्न आदेश दिँदा नमान्ने प्रहरी जवान रामबिहारी थारुलाई इन्सपेक्टर बलराम विष्ट र केशव विष्टले गोली हानी मारेको अर्को संगिन आरोप लगाएका थिए ।

यि दुई आरोप फेसबुकको स्टाटसबाट लगाएपछि प्रहरीको माथिल्लो निकायकै आदेशमा आङकाजी खोरमा पुगेका हुन् । अपराध महाशाखाले विद्युत्तीय कारोबार ऐन वमोजिम आङकाजीविरुद्ध पर्याप्त तथ्य प्रमाण बटुलेर मात्रै पक्रेको हो ।

फेसबुक स्टाटस अनुमगन गरिरहेको महानगरीय प्रहरी अपराध महाशाखाले आङकाजीले सुरक्षा निकायबीच फाटो ल्याउने, जातजाति र सम्प्रदायबीच सुमधुर सम्बन्धमा खलल पार्ने र सामाजिक सद्भाव बिथोल्ने गरी अनर्गल, निराधार र अप्रमाणिक तथ्यहरुलाई सामाजिक सञ्जालको दुरुपयोग गरी गलत सन्देश प्रबाह गरेकाले पक्राउ गरिएको जनाएको छ ।

‘फेसबुकको दुरुपयोग गरी समाजमा जातीय तथा साम्प्रदायिक सद्भाव विगार्न खोजकाले उनलाई पक्राउ गरिएको हो’, महानगरीय प्रहरी परिसरका प्रवक्ता विश्वराज पोखरेलले भने, ‘उनीमाथि विद्युत्तीय कारोबार ऐनअन्तर्गत जिल्ला अदालतमा मुद्धा अघि बढिसकेको छ । मुद्धा सुरु भइसकेकाले यसमा कसैको दबावले काम गर्दैन ।’

सोलुखुम्बुको गोराखानी गाविस–१ घर भइ काठमाडौंको बौद्धमा बस्दै आएका आङकाजीको रिहाइ माग गर्दै संघीय समाजवादी फोरमका कार्यकर्ता र आदिवासी जनजाति कार्यकर्ताहरु बिहीबार महानगरीय प्रहरी परिसर पुगेका थिए ।

तर, प्रहरीले उनीबाट सामाजिक सद्भाव विथोल्ने गतिविधि गरेको पर्याप्त प्रमाण रहेको जनाउँदै मुद्धा प्रक्रिया अघि बढाएको हो । अदालतमा मुद्धा अघि बढिसकेकाले आङकाजीले अनुसन्धान पुरा नहुन्जेल प्रहरी हिरासतमै बिताउनुपर्नेछ ।

पहिलो चरणमा प्रहरीले चार दिनको म्याद पाएको छ । चार दिनभित्रमा अनुसन्धान पुरा नभएमा अदालतबाट थप म्याद मागेर मुद्धा अघि बढाउने तयारी प्रहरीले गरेको छ ।

चार दिन हिरासतमा राख्न अनुमति

आदिवासी जनजाति महासंघका पूर्वमहासचिव आङकाजी शेर्पालाई चार दिन हिरासतमा राखेर अनुसन्धान गर्न जिल्ला अदालत काठमाडौंले प्रहरीलाई अनुमति दिएको छ ।

सामाजिक सञ्जालमा जातीय सद्भाव भड्काउने अभिव्यक्ति दिँदै आएका उनलाई महानगरी प्रहरी अपराध महाशाखाको टोलीले बुधबार बौद्धबाट पक्राउ गरेको थियो ।

विद्युत्ती कारोबार ऐनअन्तर्गत अदालतले चार दिन हिरासतमै राखेर उनीमाथि अनुसन्धान गर्न अनुमति दिएको महानगरीय प्रहरी परिसर टेकुले जानकारी दिएको छ ।

टीकापुर घटनापछि आङकाजीले प्रहरीमाथि लाएको गम्भीर आरोप (रातो घेरामा) 
  

प्रतिलिपि स्रोत:अन्नपूर्ण पोस्ट