सगरमाथा आरोहणका लागि बाटो निर्माण शुरु

सोलुखुम्बु- यस बर्षको सगरमाथा आरोहणका लागि बाटो निर्माण कार्य आजबाट सुरु भएको छ। आधार शिबिरबाट बाटो निर्माणका लागि ८ जना आइसफल डक्टरहरुले काम थालेको सगरमाथा प्रदुषण नियन्त्रण समितिले जनाएको छ । उनीहरुले सगरमाथाको क्याम्प दुइ सम्म बाटो बनाउने छन् । हिमाल आरोहणको मौसम सुरु हुन लागेपछि बाटो निर्माण सुरु गरिएको हो । हिमालमा बाटो बनाउने ब्यक्ति आइसफल डक्टरहरु फागुन २४ गते नै आधार शिबिर पुगेको भएपनि हावाहुरी र हिमपातले प्रभाबित बनाएपछि बाटो निर्माणमा ढिलाइ भएको हो । बौद्ध परम्परा अनुसार हरेक बर्ष जस्तै गत बुधबार पूजा गरेर आजबाट बाटो निर्माण सुरु गरिएको एसपिसिसिका उपाध्यक्ष लामाकाजी शेर्पाले जानकारी दिए ।

उनीहरुले एक बर्षमा हिमपातका कारण भत्कीएका पुराना बाटोको मर्मत, आरोहणमा प्रयोग हुने डोरी र भर्याङहरुको ब्यबस्थापन लगायतको काम गर्नेछन् । बाटो निर्माणका लागि ८ जना आइसफल डक्टर सहित १० जना सोलुखुम्बुको नाम्चेबजारबाट फागुन २२ गते नै सगरमाथाको आधारशिबिर तर्फ लागेका थिए । बाटो बनाउनेहरुमा आङकामी शेर्पाको नेतृत्वमा आङसार्की शेर्पा, निमादोर्जी शेर्पा, मिङमा छिरि शेर्पा, याङडा शेर्पा, मिङमातेम्बा शेर्पा, फुछेतार शेर्पा र फुकितार शेर्पा रहेका छन् । उनीहरु संगै दुइ जना कुक पनि रहेको सगरमाथा प्रदुषण नियन्त्रण समिति एसपिसिसि नाम्चेका कार्यक्रम अधिकृत कपिन्द्र राइले जानकारी दिए । उनीहरुले बाटो निर्माणका लागि एक हप्ता सम्म आधार शिबिर मै प्रशिक्षण समेत लिएका थिए ।

सगरमाथा देखि ल्होत्से र नुप्त्से हिमाल आरोहणका लागि प्रयोग गरिने आधार शिबिर एउटै हो । आधार शिबिरबाट क्याम्प दुइ सम्म तीन वटै हिमालको आरोहणका लागि बाटो पनि एउटै प्रयोग हुँदै आएको छ। आइसफल डक्टरहरुले बाटो बनाइसकेपछि आरोहीहरु सगरमाथा आरोहणका लागि आधार शिबिरबाट उकालो लाग्ने गर्दछन्।