तिङलाबासीको आन्दोलनले सोलुमा यातायात ठप्प

राधा ढुंगाना

सोलुखुम्बु- पुनर्संरचनामा असन्तुष्टी जनाउँदै सोलुखुम्बुका तिङलाबासी आन्दोलीत भएका छन्। आफुहरुको चाहना विपरित नेचा–सल्यान गाउँपालिकामा समाहित गरेको विरोधमा तिङलाबासीले सोलुखुम्बुमा यातायात शुत्रबारबाट ठप्प पारेका हुन्।

आफूहरु सोलु–दुधकुण्ड नगरपालिकामा समावेश हुन ईच्छुक भएपनि अपायक पर्ने नेचा सल्यान गाउँपालिकामा समावेश गरिएको भन्दै सोलु काठामाडौ र तराईसम्म जोड्ने तिङला सडकखण्ड अनिश्चितकालिन बन्द गरेका हुन्। सो बन्दले गर्दा नेचा सल्यान क्षेत्रवाट सल्लेरी सम्मको यातायात ठप्प भएको छ भने राजधानी र तराई गुड्ने यातायातका साधन पनि अपलपत्रमा परेका छन् । विरामीहरुलाई समेत सडक पार गर्न नदिएपछि हेलिकप्टरवाट उपचारका लागि अन्यत्र लैजानुपर्ने बाध्यता पैदा भएको छ।

सरकारले आफ्नो मागलाई पुरा नगरेसम्म बन्द लगायतका आन्दोलनका कार्यक्रम गरिरहने आन्दोलन संघर्ष समितिका संयोजक बाल कुमार कार्कीले बताए । विहिबार जिल्ला प्रशासन कार्यालय र जिल्ला विकास समितिमा धर्ना सहित नारावाजी गरेका तिंलाबासीले शुक्रबार बिहानैदेखि सोलुबाट छुट्ने कुनै पनि सावरी साधन छुट्न दिएका छैनन । तिंलालीहरुले रमितेबाट नै ओखलढुंगा तथा काठमाडौका लागी छुटेका जिप तथा नीजि सवारी साधन समेत रोकेका छन् भने सावारी आवागमन रोक्न आन्दोलनकर्ताले सडकका विभिन्न भागमा रुख ढालेका छन्।

 यता प्रशासनले आन्दोलनकारीसंग छलफल गरि समाधान खोज्ने प्रयास जारी राखेको बताएको छ। प्रमुख जिल्ला अधिकारी उमेश पाण्डेले आन्दोलनकारीलाई वार्ताका लागी बोलाईएको बताए। तर आन्दोलनकारीले आन्तरीक छलफल पछि मात्रै वार्तामा आउने प्रतिक्रिया दिएका छन्। शुक्रबार बिहान बन्द खुलाउन  गएको एक प्रहरीको टोली प्रयास असफल पछि फर्किएको प्रहरी कार्यालय सोलुखुम्बुले जनाएको छ। 

यसैबीच, आन्दोलनकारीले जिल्ला कृषि विकास कार्यलयको साना सिंचाई कार्यक्रमको प्लाष्टिक पाईप बोकेर सल्लेरी आउँदै गरेको बा ३ ख ९४१ नम्बरको मिनि ट्रकको सिसा फुटाएका छन्। बिहिबार पनि तिंलाबासीले जिल्ला प्रशासन कार्यालय र जिल्ला विकास समितिमा धर्ना सहित नारावाजी गरेका थिए। साविकको तिंला गाविस परिक्रमा गरी गाविसको कार्यालयमा तिंला स्वायत्त गाउँपालिका लेखिएको बोर्ड राखेका स्थानीयले बिहिबार करिव हजारको हाराहारीमा आन्दोलनकारी नारावाजी सहित जिल्ला प्रशासन र जिल्ला समन्वय समितको कार्यालयमा धर्ना दिएका थिए ।

यसैबीच तिङलाका स्थानीयले गरेको आन्दोलनमा नेकपा एमाले सोलुखुम्बुले ऐक्यवद्धता जनाएको छ । एमालेको पुर्ण बैठकले तिङलालाई सोलु–दुधकुण्ड नगरपालिकामा समाबेश गराउनुपर्ने धारणा पुर्नसंरचनाको क्रममै एमालेले राखेकाले आन्दोलन प्रति समर्थन जनाउने निर्णय गरेको प्रचारविभाग सचिब जगनाथ बास्तोलाले जानकारी दिए।

प्रतिलिपि अधिकार : नागरिक समाचार