सुनकोसी ‘ट्रस ब्रीज’को रामेछापतर्फको मुखनजिकै पहिरो, पहिरो करिब २५ मिटर माथिबाट खसेको

रामेछाप, माघ २० । सिन्धुली र रामेछापको सीमानास्थित सुनकोसी नदीको पुलनजिकै सुख्खा पहिरो जाँदा यातायात अवरुद्ध बनेको छ । मंगलबार (आज) साँझ करिब ५ बजे पहिरो गएपछि दुबैतर्फका यातायात रोकिएको प्रहरीले जनाएको छ । यातायातका साधन रोकिँदा यात्रुहरु बीच बाटोमै अलपत्र परेका छन् ।

सिन्धुलीको खुर्कोटमा रामेछाप जिल्ला जोड्ने गरी हालैमात्र निर्माण भएको सुनकोसी ‘ट्रस ब्रीज’को रामेछापतर्फको मुखनजिकै पहिरो गएको हो । पहिरो करिब २५ मिटर माथिबाट खसेको जिल्ला प्रहरी कार्यालय सिन्धुलीले जनाएको छ ।

पहिरो हटाउन रामेछाप र सिन्धुली दुबै जिल्लाका सुरक्षाकर्मी, सडक विभागका कर्मचारी र स्थानीय बासिन्दा खटिएका छन् । पानी नै नपरी खसेको सुक्खा पहिरो झर्नेक्रम निरन्तर भएकाले तत्काल पहिरो हटाउन गाह्रो भएको प्रहरीले जनाएको छ । पहिरो हटाएर पुल सन्चालनमा ल्याउन बुधबारसम्मको समय लाग्ने बताइएको छ ।

सुनकोसी नदीमा पक्की पुल निर्माण भएपछि बीपी राजमार्ग र मध्यपहाडी लोकमार्ग हुँदै तराईका जिल्ला, काठमाडौं, ओखलढुंगा र सोलुखुम्बुसम्मको यातायातका साधनहरु यही पुल पार गर्दै रामेछाप, मन्थली तथा दोलखा हुँदै चीनको सीमासम्म पुग्ने गरेका छन् ।