कात्तिकमा पर्‍यो ०७२ सालको दसैं र तिहार !

नयाँ सालमा ८० दिन सरकारी छुट्टी

 नयाँ वर्ष ०७२ सालमा शनिबारसहित ८० दिन सार्वजनिक विदा परेको छ । उपत्यकामा भने थप चार दिन विदा परेको छ । नयाँ वर्षको दसैं र तिहार दुबै पर्वहरु कात्तिक महिनामा परेका छन् ।

गृहमन्त्रालयले तय गरेको ०७२ सालका विदाहरु ८६ दिन भए पनि ६ वटा सार्वजनिक विदा शनिबारका दिन परेका छन् । क्षेत्रीय विदा भने यसमा समावेश छैन ।

गृह मन्त्रालयले सोमबार राजपत्रमा विदासम्वन्धी सूचना प्रकाशित गर्ने तयारी गरेको छ । गृह प्रवक्ता लक्ष्मीप्रसाद ढकालले मन्त्रिपरिषदबाट सार्वजनिक विदालाई अन्तिम रुप दिइएको बताए ।

दसैं तिहार दुबै कात्तिकमा

नयाँ वर्षको दसैं र तिहार कात्तिकमा परेको छ । घटस्थापना भने असोज २६ गते परेको छ । कात्तिक ३ देखि ७ गतेसम्म दसैं विदा छ, जसमा एक दिन शनिबार छ । कात्तिक ९ गते कोजाग्रत पूणिर्माको विदा छ ।

कात्तिक २५ देखि २७ सम्म तिहार विदा छ । अधिक मासका कारण यस्तो हुन गएको हो ।

यस्ता छन् ०७२ सालका विदा

नयाँ सालमा ५२ दिन शनिबार परेको छ ।  प्राप्त विदा सूचीअनुसार आगामी वर्ष १६ दिन पर्व विदा परेको छ, जसमा जनै पूणिर्मा भदौ १२ गते र गौरा पर्व भदौ १९ गते शनिबार परेको छ ।

अन्य पर्व विदामा १ गते नववर्ष वैशाख २१ गते उभौली पर्व, मंसिर १ गते छठ, पुस १० गते उधौली र योमरी पुन्हि तथा क्रिसमस डे, पुस १५ गते तमू ल्होसार, माघ १ गते माघी र माघ २६ गते सोमन ल्होसार परेको छ ।

त्यस्तै फागुन २४ गते महाशिवरात्री, २५ गते महिला दिवस र २६ गते ग्याल्बो ल्होसार परेको छ ।  आगामी वर्ष चैत ९ गते फागु पूणिर्मा परेको छ । तराईका जिल्लाहरुमा भने १० गते फागुको विदा छ । इदुल्ल फित्र र बकर इदमा पनि विदा दिइने गृह मन्त्रालयले जनाएको छ । तर, दिन भने तय भएको छैन ।

फागुन १ गते बसन्त पञ्चमीको सार्वजनिक विदा छ ।

सात दिन दिवस विदा

सरकारले ७ दिन दिवस विदा दिने निर्णय गरेको छ । जसमध्ये एक अपाङ्ग कर्मचारीहरुका लागि मात्र छ । माघ १६ को सहिद दिवस भने शनिबार परेको छ ।

अन्य दिवस विदामा बैशाख ११ लोकतन्त्र दिवस, १८ मा विश्व मजदुर दिवस, जेठ १५ गते गणतन्त्र दिवस, भदौ २२ गते निजामती कर्मचार दिवस र फागुन ७ गते प्रजातन्त्र दिवसको विदा परेको छ ।

यसैगरी गृहमन्त्रालयका अनुसार वैशाख ११ गते बुद्ध जयन्तीको विदा छ । श्रीकृष्ण जन्माष्टमीको विदा भने भदौ १९ गते शनिबार परेको छ ।

क्षेत्रीय विदाहरु

गृह मन्त्रालयका अनुसार भदौ ३० गते हरितालिका, असोज १ गते ऋषि पञ्चमी र असोज १८ गते जितिया पर्व मान्ने महिला कर्मचारीलाई विदा दिइनेछ ।

काठमाडौं उपत्यकाका कर्मचारीले भने थप चार दिन विदा पाउनेछन् । जसमा भदौ १३ गते गाईजात्रा, असोज १० गते इन्द्र जात्रा र चैत २५ गते घोडेजात्रा परेको छ ।

मच्छिन्द्रनाथको रथ जात्राका क्रममा भोटो देखाउने दिन पनि उपत्यकामा सार्वजनिक विदा दिइनेछ । मंसिर ९ गते गुरु नानक जयन्तीमा शिख धर्मावलम्बी सरकारी कर्मचारीलाई विदा दिइनेछ ।