भूकम्पले सगरमाथा दक्षिण–पश्चिम सर्‍यो

नेपालमा हालै गएको विनाशकारी भूकम्पको प्रभावले सर्वोच्च शिखर सगरमाथा दक्षिण–पश्चिम सरेको चीनको राष्ट्रिय नक्साङ्कन, सर्वेक्षण तथा भौगोलिक सूचना ब्यूरोले जनाएको छ।

वैशाख १२ गते गएको ७दशमलव८ म्याग्निच्यूडको भूकम्पले सगरमाथा तीन सेन्टिमिटर दक्षिण–पश्चिम सरेको तर उचाईमा आधारभूत परिवर्तन नदेखिएको ब्यूरोले सोमबार जनाएको हो। राष्ट्रिय नक्साङ्कन, सर्वेक्षण तथा भौगोलिक सूचना ब्यूरोले सोमबार जारी गरेको रिपोर्ट उद्धृत गर्दै चिनियाँसञ्चार माध्यमले सगरमाथाको उचाई परिवर्तन नभएको मंगलबार उल्लेख गरेका छन्।

ब्यूरोले २००५ देखि २०१५ भित्र प्रत्येक वर्ष चार सेन्टिमिटरका दरले यो दश वर्षमा सगरमाथा ४० सेन्टिमिटर उत्तर–पूर्व सरेको आफ्नो तथ्याङ्कले देखाएको जनाएको छ। त्यस्तै प्रत्येक वर्ष ० दशमलव ३ सेन्टिमिटरका दरले सगरमाथाको उचाई बढिरहेको सूचनामा छ। ब्यूरोले २००५ देखि नेपाल र चीनको सिमा क्षेत्रमा अवस्थित सगरमाथामा सेटलाइट अनुगमन प्रणाली जडान गरी अध्ययन गरेको थियो।

भारतीय र यूरेशियन प्लेट ठोक्किने विन्दुमा रहेकाले यस क्षेत्रको भू–चाल निरीक्षण गर्न सर्वोच्च शिखर सगरमाथालाई महत्वपूर्ण अध्ययन विन्दु मानिएको ब्यूरोले जनाएको छ। चिनियाँ विज्ञका अनुसार सगरमाथा क्षेत्रको भौगोलिक परिवर्तनले पूर्व र दक्षिण एसियाको जलवायु र वातावरणमा ठूलो प्रभाव पर्छ।भूकम्पले सगरमाथामा हिमपहिरो जाँदा डेढ दर्जन बढी आरोहीको मृत्यु भएपनि यो वर्ष आरोहण नै बन्द गरिएको थियो। वैशाख २९ को ६ दशमवल ८ म्याग्निच्यूडको भूकम्पले भने सगरमाथामा कुनै क्षति भएको छैन।