सोलु कांग्रेसको अधिवेशन स्थगित

१२ फागुन, सोलु । महाधिवेशन प्रतिनिधि छनोटमा बिबाद भएसँगै सोलुखुम्बु कांग्रेसको अधिवेशन स्थगित भएको छ ।

 महाधिबेशन प्रतिनिधि छनौटमा उत्पन्न विबादले उग्र रुप लिए पछि सोलुखुम्बुमा निर्वाचन गराउन आएका निर्वाचन अधिकृत इन्द्रमणि अधिकारी जिल्ला अधिबेशन स्थगित गरि मंगलबार काठमाडौं फर्किएका छन् ।

बैधानिक समस्या समाधान नभएसम्म अधिवेशन गर्न नसकिने भन्दै निर्वाचनको सम्पूर्ण प्रकृया स्थगित गरेको बिज्ञप्ति प्रकाशित गर्दै निर्बाचन अधिकृत काठमाडौं फर्किएका हुन् ।

एक निर्वाचन क्षेत्र भएको जिल्लामा ११ जना महाधिबेशन प्रतिनिधि र एक सभापति निर्वाचित गर्नुपर्नेमा १२ जना महाधिबेशन प्रतिनिधि चयन गरिएपछि कांग्रेस सोलुखुम्बुको १३ औँ जिल्ला अधिबेशन विबादमा परेको थियो ।

‘स्थगित रहेको चौलाखर्क र सोताङ गाविसको गाउँ अधिवेशन गर्नुपर्ने, विधान विपरीत घोषणा भएका महाधिवेशन प्रतिनिधिको टुङ्गो लगाउनुपर्ने विषयमा केन्द्रिय निर्वाचन समितिमा उजुरी परेको तर निर्णय नआएको सन्दर्भ र जिल्लाको भौगोलिक विकटताका कारण मतादाता सदरमुकाम आउने समय अभावका कारण अर्को सूचना जारी नभएसम्मका लागि निर्वाचनको सबै प्रक्रिया स्थगित गरिएको छ’ -निर्वाचन अधिकृत अधिकारीद्वारा हस्ताक्षरित विज्ञप्तीमा भनिएको छ ।

नेपाली कांग्रेस विधानले चल्ने पाटी भएकाले सबै प्रक्रिया विधानअनुसार हुनुपर्ने भन्दै पाटी कसैको खल्तीबाट पाटी चलाउन खेज्ने कार्य मान्य नहुने जिल्ला सभापति आङगेलु शेर्पाले बताए । ‘विधान विपरीत १२ जना महाधिवेशन प्रतिनिधिलाई प्रमाणपत्र वितरण गरी सभापतिका लागि ठाउँनै नराखेको अवस्थामा अधिवेशन गर्नु दरबन्दी नभएको कार्यालयमा कर्मचारीको विज्ञापन गर्नु जस्तै हो -उनले भने ।

नपाली कांग्रेसकोे विधानमा ११ जना प्रतिनिधि मात्र घोषणा गर्ने र एक मात्र निर्वाचन क्षेत्र भएको सोलुखुम्बुजस्तो जिल्लामा महाधिवेशन प्रतिनिधि तथा गाविसबाट आएका क्षेत्रीय प्रतिनिधिबाट जिल्ला कार्य समितिको सभापतिमा उठ्न पाउने प्रावधान रहेको छ । १२ जना घोषणा भएपछि सभापति महाधिवेशन प्रतिनिधि भन्दा बाहिरबाट जितेमा १३ जना हुने भएकाले समस्या हुने जिल्ला सचिव चन्द्रप्रसाद आचार्यले वताए ।

पार्टीको विधानमा समाबेशी सिद्धान्त बमोजिम ११ जना महाधिबेशन प्रतिनिधि र १ जना पार्टी सभापति निर्वाचन गर्नुपर्ने ब्यवस्था छ । विधानको व्यवस्था विपरित १२ जना महाधिबेशन प्रतिनिधि चयन गरि प्रमाणपत्र दिईएपछि सिर्जना भएको विबाद निरुपण नभएसम्म जिल्ला अधिबेशन गर्न नसकिने निष्कर्ष जिल्ला समितिले निकालेको जिल्ला सभापति आङगेलु शेर्पाले वताए ।