नजिकैबाट सगरमाथा हेर्न चाहानुहुन्छ ? विकल्प छ पत्ताले डाँडा

देशका विभिन्न पर्यटकीय स्थलहरुको भ्रमणको लागि आन्तरिक पर्यटकहरु नयाँ नयाँ क्षेत्रको खोजीमा रहेका छन् । यसरी घुमफिर गर्न चाहने आन्तरिक पर्यटकका लागि पत्ताले डाँडा एउटा शुन्दर विकल्पको रुपमा रहेको छ ।  

सोलुखुम्बु र ओखलढुङ्गाको सीमानामा पर्ने पत्ताले डाँडा राजधानी काठमाडौंबाट छोटो दूरीमा रहेको शुन्दर पर्यटकी क्षेत्र हो । यसको उचाई करीब ३१०० मिटर छ । मनोरम हिमालका दृष्याअवलोकन गर्नको लागि यो उपयुक्त डाँडा हो । यहाँबाट सगरमाथा, मकालु, कन्चनजङ्गा, लोत्से, नुम्बुर, कार्यालुङ, चोलाच्छे, ताबोचे, पुमोरी, खुम्बुचे, थामसेर्कु लगायतका शुन्दर हिमालको दृश्याअवलोकन गर्न सकिन्छ ।

 

राजधानी काठमाडौंबाट छोटो दूरीमा रहेको यो क्षेत्रमा हवाई र सडक मार्गबाट पुग्न सकिन्छ । सडक मार्गबाट त्यहाँ पुग्न विपी राजमार्ग प्रयोग गर्नुपर्छ । काभ्रेको धुलीखेल, सिन्धुलीको खुर्कोट, जयरामघाट(उदयपुर र खोटाङको सीमाना), ओखलढुङ्गा बजार हुँदै करीब १ सय ५० किमि सडक पार गरेपछि सोलुखुम्बुको पत्ताले गाँऊ पुगिन्छ ।

पत्ताले गाँउबाट करीब ४० मिनेट उकालो हिडेपछि पत्ताले डाँडा पुगिन्छ । पहिलो दिन खोटाङमा रहेको हलेसी महादेवको दर्शन गरि पत्ताले डाँडा पनि जान सकिन्छ । हवाईमार्गबाट पनि पत्तालेडाँडा पुग्न सकिन्छ । काठमाडौंबाट प्लेन चढेर करीब ३० मिनेटमा फाप्लु विमानस्थल(सोलुखुम्बु) पुगिन्छ । फाप्लुबाट करीब एक घण्टा १५ मिनेट सडक यात्रा गरेपछि  पत्ताले गाँउ पुगिन्छ ।

पत्ताले गाँउमा शेर्पा, मगर लगायतका जातीको बाक्लो बासस्थान रहेको छ । यहाँ शेर्पा लगायतको आफ्नै भाषा, सँस्कृति छ । पत्ताले गाँउ नजिकै  चर्चित धार्मिक स्थल चाङ्गेथान पनि छ । आर्थिक हिसावले यो निकै सस्तो पर्यटकीय गन्तव्य पनि हो । यसकोे लागि दुई दिन एक रात समय छुट्याउँदा हुन्छ ।  करीब पाँच देखि छ हजार रुपैयाँमा यो क्षेत्रमा घुमेर आउन सकिन्छ ।

पर्याप्त समय भएका पर्यटक जुनबेसी, पिकेडाँडा, थुप्तेन छोलिङ गुम्बा, चिवाङ गुम्बा, दूधकुण्ड लगायतका आकर्षक क्षेत्र पनि घुम्न सक्छन् ।

तस्वीर : इन्सु राई ।