सोलुखुम्बुमा अधिकांश घरहरुमा पूर्ण क्षति, ३ जना विद्यार्थी घाईते

बुद्धवीर बाहिङ/नाम्चे सोलुखुम्बु, २९ वैशाख । वैशाख १२ को महाभूकम्पपछि विस्तारै मत्थर बन्दै गएको सोलुखुम्बु बासीलाई आजको ७.३ रेक्टरस्केलको भूकम्पले फेरि तरंगीत बनाइदिएको छ । जिल्लाभरी आंशिक रुपमा क्षतिग्रस्त भएका घरहरुलाई पूर्ण रुपमा क्षति पु¥याएको छ भने ३ जना विद्यार्थी घाइते भएका छन् । 

महेन्द्रोज्योति उच्च माध्यमिक विद्यालय चौंरीखर्कको भवन भत्किदा विद्यार्थी घाईते भएका हुन् । घाईते हुने विद्यार्थीहरुमा फुर्वायाङजी तामाङ, सुमित्रा शेर्पा र ङिमाडोल्मा तामाङ गम्भिर गाईते भएको ईलाका प्रहरी कार्यालयका प्रहरी निरीक्षक रामकाजी थामिले बताए । 

भुकम्पको केन्द्रविन्दु सोलुखुम्बु नजिकै भएर पनि सोलुखुम्बुमा धेरै भौतिक संरचाना ध्वस्त भएका छन् । जिल्लाको अधिकांश क्षेत्रका घरहरु बस्न नसकिने भएको जिल्ला प्रहरी कार्यालय सोलुखुम्बुले जनाएको छ । 

जिल्लाको माथिल्लो क्षेत्र अर्थात सगरमाथा क्षेत्रका हिमालबाट ठूला ठूला हिउँका ढिका र ढुंगा खस्दा नाम्चे, खुम्जुङ र चौंरीखर्क गाविसका स्थानीयहरु त्रसित बनेका छन् । झनै दुधकोशी तिरमा बसेका खुम्बुबासीहरु भुकम्प गए लगत्तै सुरक्षित ठाउँमा गएको उनीहरुले बताए । 

नाम्चेबासीहरु खुल्ला चउरमा पाल टागेर बसिरहेका छन् । सिमित मात्र पाल भएकाले पालभित्र बुढाबुढि, बिरामी र बालबच्चाहरुलाई मात्र राखिएको छ । अरु स्थानीयहरु खुल्ला आकाशमै भए पनि रात कटाउने सोचमा रहेको नाम्चेका स्थानीय लामाकाजी शेर्पाले बताए ।