भुकम्पले सोलुखुम्बुको ९८ विद्यालय भवनमा क्षति पुग्दा पठनपाठनमा समस्या

गत हप्ता गएको महाभुकम्पले ठूलो धनजनको क्षति भएको छ । विद्यालयमा समेत क्षति पुग्दा शैक्षिक सत्रको शुरुवातमै पठनपाठनमा कठिनाई देखा परेको छ । सोलुखुम्बुमा दर्जनौ भवन भत्किएका छन् भने पुरापुर ९८ वटा विद्यालयमा क्षति पुगेको छ । यो क्षतिसंगै सुरक्षित वातावरणमा अध्ययन अध्यापनका लागी समस्या उत्पन्न भएको हो ।

जलेश्वरी निमावि सल्यानको विद्यालय भवन भत्किएपछि शिक्षक अविभावक अलमलमा परेका छन् । शैक्षिक सत्रको शुरुवातीमै भुकम्पको धक्का र क्षतिले शैक्षिक सत्रकै पठनपाठनमा धक्कमा पुगेको महसुस भएको हो । पठनपाठन सुचारु गर्न उनीहरुले अविभावकको सहयोगमा चित्राले बार्ने मानसिक योजना बुनेको प्रध्यानाध्यापक थिलराज निरौलाले बताए ।

उनीहरु पठनपाठन सुचारु गर्नका लागी पालको खोजिमा छन् । यदि पाल नपाए विकल्प चित्रा नै हो । भवनमा क्षति पुगेपछि न विद्यार्थी सुरक्षित भई अध्ययन गर्न सक्छन्, न अध्यापन गराउनै सकिन्छ ढुक्क संग । शैक्षिक सामाग्रीमा समेत क्षति पुगेपछि चिन्ता थपिएको हो ।

सोलुखुम्बुका ९८ विद्यालयमा भुकम्पले क्षति पुर्याएको मध्ये दर्जनौ विद्यालय पठनपाठनको लागी उपयुक्त छैन् । व्यवस्थापन समिति र स्वयम् प्रध्यानाध्यापक मात्र चिन्ता छैनन् । अविभावक पनि उत्तिकै चिन्तामा थलिएका छन् । बारम्बार महसुस भईरहने भुकम्पका स साना कम्पन र विद्यालयको पुर्वाधारको अवस्था देख्दा सुरक्षाको दृष्टिकोणले पनि अविभावक त्रसित छन् । यो पिडा धेरै अविभावक, शिक्षकको हो । तर, समस्याका बीच पनि पठनपाठन सुचारु गर्ने गार्मा मावि गार्माका प्रअ विनोद तामाङको भनाई छ ।

यता, जिल्लाको शैक्षिक संस्थाहरुमा भएको क्षतिलाई लेखाजोखा गर्दै निकट भविष्यमा पुर्ननिर्माण गर्न तर्फ पहलकदमी शुरु गरेको जिल्ला शिक्षा कार्यलय सोलुखुम्बुले जनाएको छ । जिल्ला शिक्षा अधिकारी वीर बहादुर खड्काका अनुसार सरकारी तथा गैरसरकारी निकायसंगको समन्वय शुरु भएकाले उनीहरुको सहकार्यमा पुननिर्माण शुरु गरिने छ ।

समस्याका बीच भवन भत्किएको र चर्किएको दृष्य अगाडी राखेर शुरु भएको पठनपाठन र त्रास बाँचेको मनले पठनपाठनमा भाग लिदा सिकाई क्रियाकलाप कति प्रभावकारी होला भन्ने प्रश्न उठेको छ । त्यस कारण अविलम्ब शिक्षाक्षेत्रमा काम गर्ने निकायहरुको पहलकदमीमा निकट भविष्यमा सुरक्षित पठनपाठनको वातावरणको व्यवस्था मिलाईनुपर्छ ।
स्रोतःहिमाल एफएम