सञ्चै छ नाम्चेलाई

सोलुखुम्बु-‘नाम्चे बजार पूरै ध्वस्त भनेर हल्ला चलाइयो, बजारका केही आवायीय घरबाहेक केही भएको छैन,' नाम्चे बजारका आङछिरिङ शेर्पाले वास्तविकता सुनाए।

भूकम्पले तर्सिएर पर्यटकहरु फर्किनु स्वाभाविक भए पनि यहाँका होटल र लजहरु जस्ताको तस्तै छन्। ‘हामी पर्यटकलाई जतिखेर पनि सेवा दिन तयार छौं,' होटेल व्यवसायी शेर्पाले भने। हिमपहिरोले गरेको बाहेक खुम्बु क्षेत्रमा बाहिर हल्ला गरे जस्तो क्षति नभएको उनको भनाइ छ।

सगरमाथाको प्रवेशद्वार नाम्चेले प्रचार गरिएजस्तो क्षति बेहोरेको छैन। केही घर सामान्य चर्किएका छन्। त्यसबाहेक नाम्चे बजारमा ठूलो क्षति भएको छैन। नाम्चेका ग्रामीण भेगमा भने अढाइ सय जति निजी घर पूर्णक्षति र डेढ सय जतिमा आंशिक क्षति भएको छ।

‘बजारका ४ जटा होटल र लज क्षतिग्रस्त छन् अरु सामान्य। नाम्चे बजार पूरै ध्वस्त भनियो तर त्यो वास्तविकता होइन,' नाम्चेका अगुवा आङफिन्जो शेर्पाले नागरिकसँग भने, ‘अहिले पनि यहाँका सबै पर्यटन व्यवसायी पर्यटकको सेवा गर्न तयार छन्, नाम्चेको मुहार जस्ताको तस्तै छ।' 

५३ वटा होटल र लज रहेको नाम्चे बजार विश्वकै आकर्षक पर्यटकीय नगरी हो। सर्वोच्च शिखर सगरमाथाको आधार शिविरमा गएको हिमपहिरोमा नाम्चेका परी २ जनाले ज्यान गुमाएबाहेक यहाँ मानवीय क्षति भएको छैन।

नाम्चे पूरै क्षतिग्रस्त भनेर अन्तर्राष्ट्रिय सञ्चार माध्यमा समाचार आएपछि अवस्था बुझ्न चार दिन पैदल हिँडेर पुग्दा अवस्था पहिलाको जस्तै पाएको खुम्बु क्षेत्रको रिपोर्टिङपछि सदरमुकाम सल्लेरी फर्किएका स्थानीय एफएम रेडियोका पत्रकार विक्रम श्रेष्ठले बताए। ‘आधा दर्जन होटल–लज चर्किएको देख्यौं, तुलनात्मक हिसाबले नाम्चेभन्दा खुम्जुङमा क्षति रहेछ।' चौंरीखर्क गाविसभरि १ सय १५ र खुम्जुङमा ९० वटा सुविधासम्पन्न होटल र लज छन्। खुम्बु क्षेत्रमा महाभूकम्पका कारण होटल र लजभन्दा व्यक्तिगत घरमा बढी क्षति भएको सरकारी तथ्यांकले देखाएको छ। 

खुम्बु क्षेत्रमा यो सिजनमा घुम्न गएका अधिकांश पर्यटक फर्किए पनि फेरि भित्रिनेको संख्या विस्तारै बढेको छ।

सस्तो ब्याजदरमा ऋण दिन माग

खुम्बु क्षेत्रका बासिन्दाले सुलभ ब्याज दरमा २५ लाख रुपैयाँसम्म ऋण उपलब्ध गराउन माग गरेका छन्। ग्रामीण भेगमा पक्की घर बनाउनेलाई १५ लाख र सहरी क्षेत्रमा २५ लाखसम्म ऋण दिने तयारी भइरहँदा यस क्षेत्रमा पक्की घर बनाउन अन्य क्षेत्रको तुलनामा महँगो हुने भन्दै सहरी क्षेत्रमा जस्तै २५ लाख रुपैयाँ उपलब्ध गराइदिन माग गरिएको हो। नाम्चेका होटल व्यवसायी आङनुरु शेर्पाले एक बोरा सिमेन्टकै ७ हजार तिर्नुपर्ने भएकाले घर बनाउन महँगो पर्ने बताए। घर निर्माण गर्न कच्चा पदार्थ ढुवानी खर्च नै महँगो हुने भएकाले सहुलियत ब्याजमा ऋण उपलब्ध गराउन नाम्चेबासीले माग गरेका छन्।