खुम्वुमा ५० सेन्टिमिटर बाक्लो हिउँ परेपछि जनजीवन प्रभावित

सोलुखुम्बु-आइतबार मध्यान्ह देखि पर्न शुरु गरेको बाक्लो हिमपातका कारण जिल्लामा माथिल्लो क्षेत्र खुम्बुको जनजीवन प्रभावित बनेको छ। २४ घण्टादेखि लगातार परेको हिमपातले अहिलेसम्म नाम्चे भन्दा माथिल्लो क्षेत्रको मानववस्तिमै ५० सेन्टिमिटरको हाराहारीमा हिउँ जमेको छ। 

अहिलेसम्मकै बाक्लो हिमपातका कारण खुम्बु क्षेत्र घुम्न आउने पर्यटकहरुलाई आवतजावत गर्न निकै कठिनाई भएको छ भने स्थानीयहरु घरबाहिर निस्कने सक्ने अवस्थामा छैनन्। ५० सेन्टिमिटरको हाराहारिमा हिउँ जमेको छ, यहाँ कोही पनि घर बाहिर निस्कने सक्ने अवस्था छैन' स्थानीय खुम्बु एफ.एम.मा कार्यरत रेडियो प्राविधिक प्रविण राईले भने, 'हिउँकै कारण धाराहरुमा पानी समेत आउन छाडेको छ, दैनिकि निकै कष्टकर छ।' हिउले नाम्चे बजार, खुम्जुङ, खुन्दे र थामे लगाएतका स्थानमा टेलिफोन, इन्टरनेट र विद्युत सेवा समेत अबरुद्ध भएको छ। खुम्बुको तापक्रम आज माइनस ९ डिग्रि सेल्सियसको हाराहारिमा रहेको सगरमाथा राष्ट्रिय निकुञ्जले जनाएको छ। खुम्बु क्षेत्रमा अझै दुई देखि तीन दिनसम्म हिमपात हुन सक्ने मौसम पूर्वानुमान महाशाखाले जनाएको छ।

त्यस क्षेत्रका सम्पुर्ण बजार पसलहरु पुर्ण रुपमा बन्द रहेका छन्। हिउँका कारण चौरी गाईहरुको समेत बिजोग भएको छ। खुल्ला आकाश मुनी बस्ने चौरी गाईहरु झण्डै पुरिने अबस्थामा पुगेका छन्। हिउँ सँगै बाक्लो हुस्सु र कुहिरोले जिल्लामा रहेको ३ वटै बिमानस्थलमा कुनै पनि उडान हुन सकेको छैन। मौसम प्रतिकुलताका कारण लुक्ला, फाप्लु र काँगेल विमानस्थलमा हवाई उडान ठप्प हुँदा सैयौँ यात्रु मारमा परेका छन्। त्यस्तै बर्षा र चट्याङका कारण रिपिटर टावरमा खराबी आएसँगै नेपाल टेलिकमद्धारा वितरित ल्याण्ड लाइन फोन, मोबाईल र ईन्टरनेट सेवा पूर्ण रुपमा अबरुद्ध हुँदा सेवाग्राही मारमा परेका हुन्। टेलिफोन तथा ईन्टरनेट अभावको मार सबै भन्दा बढी जिल्लामा संचालित सञ्चारगृहहरु, वित्तिय संस्था र साइबरलाई परेको छ। बर्षाकै कारण सोलुखुम्बुमा जारी राष्ट्रपति रनिङ शिल्ड प्रतियागिताका आज हुने खेलहरु प्रभाबित भएका छन्। भलिबल तथा एथ्लेटिक्सका खेलहरु आज संचालन हुनु पर्ने भए पनि बर्षाले खेल मैदान हिलाम्मे बनाए पछि खेल सुर गर्न नसकिएको जिल्ला खेलकुद विकास समितिले जनाएको छ।