एमाले सोलुखुम्बका अध्यक्ष आङनिमा माथि हातपात

एमाले सोलुखुम्बुको अध्यक्ष आङनिमा शेर्पा माथि अञ्चल कमिटि सदस्यले हातपात गरेका छन् । अधिवेशनको विषयमा छलफल भैरहँदा अञ्चल कमिटि सदस्य बुद्धिकुमार राजभण्डारीले शेर्पा माथि हातपात गरेका हुन् । पार्टी कार्यालयमा जिल्लाको दुई नेताबीच हात हालाहाल भएको हिमाल एफएम लेख्छन् । पार्टीको अधिवेशनको बिषयमा सचिवालय कमिटिका सदस्यहरु बीच छलफल भईरहँदा एमाले सगरमाथा अञ्चल कमिटीका निवर्तमान सदस्य बुद्धिकुमार राजभण्डारीले अध्यक्ष आङनिमा लामा माथि एक्कासी हात हालेका हुन् । 

सल्लेरी स्थित पार्टी कार्यालयमा बसेको सचिवालय बैठकमा पार्टीको नवौं महाधिवेशन सकिएको एक बर्ष बित्न लागि सक्दा समेत हुन नसकेको जिल्ला अधिवेशनको मिति तोक्नेबारे छलफल भईरहेको बेला घटना भएको हो  । करीब १ महिना अघि फागुन २३ र २४ गते अधिवेशन सम्पन्न गर्ने गरी मिति तोकिएको थियो । सो समयमा अधिवेशन गर्न आन्तरिक तयारी नपुगेको भन्दै अर्को मितितय गर्न सचिवालयको बैठक बोलाईएको थियो ।

घटना पश्चात आङनिमा लामाले पत्रकार सम्मेलन गरी आफू माथि राजभण्डारीले नियोजित रुपमा आक्रमण गरेको बताएका छन् । राती पत्रकार सम्मेलन गरि लामाले ४ दिन देखि बैठक राख्न खोज्दा पनि विभिन्न बाहाना बनाएर बैठक राख्न नदिएको र सचिवालय कमिटी बैठकमा सदस्य नै नभएका व्यक्ति आएर अनावश्यक बिषयमा तर्क बितर्क गरेको तथा नजिकै बसेका बेला आफूमाथि आक्रमण गरेको दाबी गरे । 

यस्तै, राजभण्डारीलाई सुस्त चेतना भएको व्यक्तिको संज्ञा दिदै विवेक नभएका व्यक्तिहरुले राजनीति गर्दा पार्टीमा खलल पुग्दै गएको आरोप लगाए । जिल्ला पार्टीको इृतिहासमै सबैभन्दा नराम्रो घटना भएको भन्दै लामाले यस प्रकृतिको घटनाले नेता कार्यकर्तामा गम्भीर असर पर्ने बताए । यद्यपी जिल्ला तथा गाउँका नेता कार्यकर्ताहरुलाई यस्तो घटनाबाट कत्तिपनि विचलीत नहुन लामाले आग्रह गरे । घटना पश्चात एक विज्ञप्ती जारी गर्दै उहाँले उक्त घटनाले आफु लगायत पार्टीका जनसंगठन, पार्टी सदस्यहरु,  शेभेच्छुकहरु, शुभचिन्तकहरुलाई स्तब्ध बनाएको उल्लेख गरेका छन् । साथै सोलुखुम्बुका कार्यकर्तालाई स्वाभिमानी र अनुशासित एमाले निर्माण गर्न एकताबद्ध हुन आग्रह समेत गरेका छन् ।

यही फागुन २३ र २४ गते हुने भनिएको नेकपा एमाले सोलुखुम्बुको जिल्ला अधिवेशन आगामी बैशाख सम्मका लागि सारिएको छ । आन्तरिक तयारी नपुगेको भन्दै २०७२ साल बैशाख २७ र २८ गते गर्ने गरि सारिएको एमाले सचिव डुफकुमार बास्तालाले जानकारी दिए । अधिवेशनका लागि प्रतिनिधि छनौट, प्रतिवेदन तयार गर्ने लगायतका काम पूरा नभएको भन्दै अधिवेशन सार्न लागिएको हो ।

स्रोतःशेर्पाखबर