अन्डा बेचेरै मासिक ९ लाख आम्दानी !

काठमाडौं,वैशाख ३ – दुबईस्थित स्ट्यान्डर्ड चार्टड बैंकमा क्यासियर पदमा जागिर खाँदा मेरो मासिक तलब २ लाख रुपैयाँभन्दा बढी थियो । ०५९ मा भिजिट भिसा लिएर दुबई पुगेपछि मैले करिब १० वर्षसम्म त्यहीँ काम गरे । तर पैसाले मात्र मलाई आत्मसन्तुष्टि दिएन । बरु आफ्नै देशमा फर्केर केही गरौं भन्ने जाग्यो । त्यसेले व्यास–८ चापाघाटमा फर्केर कुखुरकापालतमा व्यस्त भएँ । 

नेपाल फर्केको तीनचार महिनासम्म त्यत्तिकै बसेँ । एकदिन चितवनमा घुम्न जाँदा साथीहरुले पनि त्यही व्यवसाय गरेको देखेर कुखुरापालनमै लगानी गर्ने सोच बनाएँ । लगानी गर्न सक्ने हो भने आम्दानी पनि राम्रै हुने देखेको थिएँ र अहिले त्यही सोच फलिफाप भएको छ । यो व्यवसायबाट राम्रै आम्दानी भएको छ ।

मैले चार रोपनी जग्गा १५ वर्षका लागि जिलमा लिएर ०६९ देखि कुखुरापालन सुरु गरेको हुँ । त्यतिबेला १६ सय कुखुराका चल्ला पालेर व्यवसाय थाल्दा यसमा जम्माजम्मी १७ लाख रुपैयाँ लगानी भएको थियो । २०७१ साउन १ गते ४६ सय कुखुराको चल्ला पाल्न सुरु गरेर अहिले दैनिक २९४० अन्डा बिक्री गर्दै आएको छु । यसबाट झन्डै मासिक ९ लाख आम्दानी भइरहेको छ ।कुखुरापालनमा हालसम्म ७० लाखभन्दा बढी लगानी भइसकेको छ ।

अन्डा संकलनका लागि कुखुरा फार्मभित्र १५७ वटा डालो राखिएका छन् । कुखुराले त्यही डालोमा अन्डा पार्ने र दैनिक ३ पटकसम्म अन्डा संकलन गर्ने गरिएको छ । बाहिरको हल्लाले कुखुरा तर्सने भएकाले भजनसहितको संगीत बजाइन्छ ।

कात्तिक १५ गतेबाट अन्डा उत्पादन सुरु भएको हो । अन्डाको माग यति थियो कि मंसिरबाटै बजारमा बिक्री गर्न थालें । दैनिक २८ हजार रुपैयाँको अन्डा बिक्री हुने गरेको छ । दाना र ज्यालामा दैनिक हजार रुपैयाँ खर्च हुन्छ । १५ हजार रुपैयाँ नाफा हुन्छ । अन्डा बिक्रीका लागि बजार अभाव छैन । बरु माग अत्यधिक छ । त्यसअनुसार उत्पादन हुनै सकेको छैन ।

व्यवसायमा धैर्य चाहिन्छ । सुरुमा १८ लाखको दाना खर्च भएपछि मात्रै अन्डा उत्पादन हुन थालेको थियो । दिनमा १६ हजार १ सय रुपैयाँ दानामा मात्रै खर्च हुन्थ्यो । अन्डाबिक्रीबाट मासिक मोटामोटी ४ लाख ५० हजार रुपैयाँ नाफा हुने गरेको छ । आजको कारोबार दैनिकमा कृष्ण न्यौपानेले कुखुरा पालनमा लागेका हिमाल श्रेष्ठसँग गरेको कुराकानीमा आधारित एक सामग्री छापिएको छ ।