सगरमाथामा मृत्यु हुनेको पहिचान खुल्यो १० नेपाली, ५ विदेशी तथा दुई महिला आरोही

सगरमाथा आधार शिविरमा मृत्यु भएकामध्ये १५ जनाको पहिचान खुलेको छ । यसमा १० जना नेपाली र ५ विदेशी छन । दश नेपालीमध्ये नौ जना एउटै कम्पनीका नेपाली कामदार परेका छन् । 

पर्यटन विभागले २० जनाको मृत्यु भएको खबर जानकारीमा आएपनि मंगलबारसम्म १५ जनाको पहिचान भएको बताएको छ । घाइते ६१ जनालाई उद्दार गरिएको छ । यिमध्ये अधिकाशंलाई आइतबार नै काठमाडौं ल्याइएको थियो ।  

विभागका महानिर्देशक तुलसी गौतमका अनुसार, आधार शिविरमा मृत्यु हुनेमा लाक्पा छिरिङ शेर्पा, शिवकुमार श्रेष्ठ, पेमा हिसी शेर्पा, दावा छिरी शेर्पा, पेम्बा शेर्पा, मिलन राई, पासाङ्ग तेम्बा शेर्पा र तेन्जिङ्ग भोटे छन ।

पहिलो चिनीयाँ महिला आरोहण दलसँग गएका लाक्पा छिरिङ्ग शेर्पा ड्रिमर डेस्टीनेशन ट्ेरकका हाई अल्टीच्यूट वर्कर हुन । उनको मुलघर खुम्जुङ्ग –५ सोलुखुम्बु हो । शिवकुमार श्रेष्ठ ड्रिमर्स डेस्टिनेशनकै भान्से हुन । उनी खहरे – ४ दोलखा निवासी हुन ।

त्यसैगरी हिमालयन गाइड्स नेपाल ट्ेरक्स एण्ड एक्सीपिडिसनका नौ जनाको मृत्यु भएको छ । यसमा एक जना आरोही अमेरिकी नागरिक र बाँकी आठ जना नेपाली छन् । विभागका अनुसार, मृत्यु हुनेमा बुङ – ९ सोलुखुम्बुका पेम्बा हिसी शेर्पा, छिमी दावा शेर्पा, मिलन राई, चौरीखर्क –२ का दावा छिरी शेर्पा, खुम्जुङ – ६ का पासाङ तेम्बा शेर्पा, गोराखानी – ८ का तेन्जिङ भोटे, ताकसिन्दा – ५ का पेम्बा शेर्पा र चेस्काम – ४ सोलुकै कृष्ण कुमार राई छन् । मृत्यु हुने नेपालीमध्ये पाचँ जना हाई अल्टीच्यूट वर्कर (शेर्पा) हुन भने तीन जना भान्से हुन् ।

विभागका फोकलपर्सन ज्ञानेन्द्र श्रेष्ठका अनुसार, मृत्यु हुने विदेशीहरुमा आरोहीहरु टेक्नोलोजी कम्पनी गुगलका कार्यकारी अमेरिकी नागरिक डान फ्रेडिनवर्ग छन् । डान बेउल एडभान्चर प्रालिको टिमबाट सगरमाथा गएका थिए । त्यसैगरी हिमालयन गायड्सबाट गएकी अमेरिकी नागरिक मारीसा इभ गिरावाङ, ड्रिमर्स डेस्टीनेशनबाट गएकी अष्ट्रेलियन महिला रेनु फोतेदार र डीडी ट्ेरकबाट गएका चिनियाँ नागरिक जेनफ्याङ जी छन् । त्यसैगरी ड्रिमर्सबाटै आधारशिविरसम्मको पदयात्राकालागि गएका जापानी नागरिक योमागाटो होरोसीको पनि मृत्यु भएको छ । उनको उपचारका क्रममा काठमाडौमा मृत्यु भएको हो । 

शनिबार दिउँसो आएको भूकम्पका कारण आधार शिविरमा आएको हिमपहिरोमा परी यि १५ जनाको मृत्यु भएको हो । ‘त्यो दिन अधिकांश आरोही पहिलो र दोस्रो क्याम्पमा थिए । उनीहरुलाई केही भएन,’ महानिर्देशक गौतमले भने । आधार शिविरमा पनि पुमरी तीर क्याम्प भएकाहरुको मृत्यु भएको छ । दिउसो भान्से र शेर्पाहरु आराम गरिरहेका थिए भने विदेशी आरोहीहरु अनुकुलनका लागि तलमाथि गरीरहेका थिए । यी दुई क्याम्पमा मात्रै १ सय ८२ जना अलपत्र परेका थिए । हिमपहिरो र भुकम्पले बाटो नै विगारेपछि यीनलाई सोमबार हेलिकप्टरबाट आधार शिविरमा झारिएको छ । ‘हिजो चारवटा साना हेलिकप्टरले १ सय ८२ जनालाई आधार शिविरमा ल्याएको हो,’ महानिर्देशक गौतमले भने ।

मौसममा सुधार भए आरोहीहरुले सगरमाथा आरोहणलाई निरन्तरता दिने भनेका छन् । ‘१०/१५ दिन मौसम सप्रिए यो वर्षको आरोहण नरोकिएला,’ महानिर्देशक गौतमले भने ।

यो सिजनमा सगरमाथा, ल्होत्से, नुप्से, मकालु, धौलागिरी, अन्नपुर्ण लगायतका हिमाल आरोहणकालागि १ हजार ४ सय ७३ आरोहीले विभागबाट अनुमति लिएका थिए । यिमध्येबाट सबैभन्दा धेरै सगरमाथाका लागि अनुमति लिनेहरु ३ सय ५८ छन् । यसमा नेपाली १८ जना नेपाली छन् । त्यसैगरी ल्होत्सेका लागि १ सय १८ र नुप्से हिमालका लागि ३४ जनाले आरोहण अनुमति लिएका छन् । विभागले मकालु, धौलागिरी, अन्नपुर्ण लगायतका हिमाल आरोहणमा गएकाहरू भने सकुशल छन् । त्यसैगरी लाङटाङमा पदयात्राका लागि गएका करिब २ सय पदयात्रीमध्ये करिब ४५ जना लामा होटल र ४५ जति पदयात्री क्यान्जिङ्ग गुम्बामा अलपत्र परेका छन् । विभागले भूकम्पका कारण बाटो ब्रिग्रिदा केही पदयात्री घाइते भएको बताएको छ ।