आप्पा सहयोग बोकेर नाम्चेतर्फ

कीर्तिमानी आरोही आप्पा शेर्पा अमेरिकाबाट ल्याएको सहयोगको पोको बोकेर खुम्बुतर्फ लागेका छन्। 

आफ्नो गाउँका स्कुलको सहयोगका लागि आप्पा फाउन्डेसनलाई दाताले उपलब्ध गराएको किताब, पैसा तथा कम्प्युटरलगायतका सामग्री लिएर शुक्रबार बिहान आप्पा आफ्नो समूहसहित नाम्चे जाँदैछन्। 

अमेरिकाबाट बुधबार काठमाडौं आइपुगेका आप्पाको टोलीमा फाउन्डेसनका उपसभापति भालेरी लिट्लेन्टनसहित अन्य दाता र सहयोगी छन्।

आप्पा फाउन्डेसन, स्टोरी साइकल र गुगलले नेपालको खुम्बु क्षेत्रलाई गुगल स्ट्रिट यूमा राखेपछि फाउन्डेसनमा सहयोगी बढेका छन्। 

आप्पा फाउन्डेसनले सहयोग गरिरहेका खुम्बु क्षेत्रका विभिन्न स्कुलमा सामग्री हस्तान्तरण गर्ने र उनीहरूका आवश्यकता पहिचान गर्ने योजना आप्पाको छ। 

आप्पाको गाउँमा रहेको थामे स्कुलसमेत पुगेर फर्किने टोलीको कार्यक्रम छ। आप्पाको गाउँमा सहयोग गर्न फाउन्डेसनमा दाताहरूले सहयोग बढाइरहेकोले थप कार्यक्रम र प्राथमिकता निर्धारण गर्न आवश्यक भएको भालेरीले बताइन्।

उनीहरूले स्कुलमा आवश्यक कम्प्युटर, शिक्षक तथा उसका लागि चाहिने तलब तथा अन्य भौतिक पूर्वाधार उपलब्ध गराउने योजना बनाएका छन्। 

आप्पाले खुम्बु क्षेत्रका स्कुल तथा अस्पतालसँगै नेपालको पूर्वदेखि पश्चिमसम्मको हिमाली भेगका स्कुलमा समेत सहयोग गर्ने योजना अन्नपूर्णलाई सुनाए।

गुगल स्ट्रिट भ्युमार्फत आप्पाको गाउँदेखेपछि सबैले त्यही क्षेत्रमा सहयोग गर्न चाहेको आप्पाले स्मरण गरे। 'आप्पालाई सबैले चिन्थे तर म जन्मेको गाउँ कसैले चिन्दैनथे। 

गुगल स्ट्रिट भ्युले मेरो गाउँ पनि संसारभर चिनायो' ठमेलको एक होटेलमा आप्पाले अन्नपूर्णसँग भने,'खुम्बुको सुन्दरता हेर्न आउँछु भन्ने दिनदिनै बढेका छन्।'

२१ पटक सगरमाथा आरोहण गरेका आप्पा हिमाली भेगमा बस्ने शेर्पा युवालाई शिक्षित बनाएर आरोहणबाहेकका कामसमेत गर्न सक्छन् भन्ने देखाउन चाहन्छन्। 

'मैलेजस्तै भारी बोकेरमात्रै जीवन चलाउने भन्दा फरक रूपमा खुम्बुका अबको शेर्पा पुस्ताको विकास गर्न चाहन्छु। यसैका लागि फाउन्डेसनमार्फत सहयोग ल्याएका हौं' आठ वर्षदेखि अमेरिकामा बसोबास गर्दै आएका आप्पाले भने।

विश्वकै सबैभन्दा ठूलो सर्च इन्जिन गुगलको सहयोगमा फाउन्डेसन र स्टोरी साइकलले तयार पारेको सगरमाथाको भर्चुअल टुर गर्नेको संख्यासमेत बढिरहेको जानकारी फाउन्डेसनले दिएको छ। 

स्थानीय बासिन्दाले लुक्ला विमानस्थलदेखि सगरमाथाको फेदसम्मको रोमाञ्चक यात्रा अनलाइनमार्फत हेरे, नहेरेको थाहा पाउन र सुझावसमेत खुम्बु यात्राका क्रममा लिइने स्टोरी साइकलका सौरभ ढकालले बताए। 

आप्पा नेतृत्वको टोलीले नाम्चेसहित खुम्बुका विभिन्न क्षेत्रमा स्ट्रिट यू देखाउने कार्यक्रमसमेत बनाएको छ। 

उनीहरू सगरमाथाको आधारशिविरसम्म पुगेर फर्कने योजनामा छन्। यात्राका क्रममा बाटोमा पर्ने सबै स्कुल तथा अन्य सामाजिक आवश्यकताको अध्ययन गर्ने तयारी उनीहरूको छ।

गत महिना सान फ्रान्सिस्कोमा आप्पा फाउन्डेसनले खुम्बु क्षेत्रको प्रचार प्रसारका लागि गुगल स्ट्रिट यू सार्वजनिक गर्ने कार्यक्रम आयोजना गरेको थियो। 

गुगलको सहयोगमा तयार पारिएको स्ट्रिट भ्युले खुम्बु क्षेत्रको पर्यटकीय सम्भावनालाई अझ फराकिलो पारेको छ। 

आप्पाले भने,'यहीँबाट (अमेरिका) तिम्रो गाउँ हेरे नि भन्दै भेट्न आउने बढिरहेका छन्।'